Fara í efni

Fréttir

Ársfundur Sjálfbærniverkefnisins

Í gær, miðvikudaginn 20. október, fór ársfundur Sjálfbærniverkefnis Alcoa Fjarðaáls og Landsvirkjunar fram í Valaskjálf á Egilsstöðum.

Aflýsa þurfti ársfundi verkefnisins í fyrra vegna heimsfaraldurs Covid-19 og var síðasti ársfundur því haldinn árið 2019. Þema fundarins að þessu sinni var jafnréttismál í víðu samhengi og fjölluðu fyrirlesarar á fundinum um jafnrétti frá ýmsum sjónarhornum. Bryndís Elfa Valdemarsdóttir frá Jafnréttisstofu setti jafnrétti í samhengi við sjálfbærni, Tinna Kristbjörg Halldórsdóttir frá Austurbrú sagði frá niðurstöðum rannsókna sem gerðar hafa verið á kynjamyndum á Austurlandi og þau Sturla Jóhann Hreinsson frá Landsvirkjun og Dagmar Ýr Stefánsdóttir frá Alcoa Fjarðaáli fjölluðu um vinnu fyrirtækjanna við aukið jafnrétti og þróun ýmissa verkefna á því sviði.

Ársfundinum var í fyrsta sinn streymt á netinu og hægt er að horfa á öll erindi hans á Youtube-rás Sjálfbærniverkefnisins.

Ársfundur 2021

Ársfundur Sjálfbærniverkefnisins 2021 verður haldinn í Valaskjálf á Egilsstöðum miðvikudaginn 20. október kl. 10:00-14:00

Þema fundarins Jafnréttismál í víðu samhengi. Á fundinum munu sérfræðingar Jafnréttisstofu, Austurbrúar, Landsvirkjunar og Alcoa Fjarðaáls fjalla um jafnrétti frá ýmsum sjónarhornum.

Skráning á ársfund 2021


 

Dagskrá

Fundarstjóri: Björn Ingimarsson, sveitarstjóri Múlaþings.
Kl. Lýsing Fyrirlesari Stofnun
10:00 Setning Jóna Bjarnadóttir Landsvirkjun
10:10 Jafnrétti í vegferðinni að sjálfbærni Bryndís Elfa Valdemarsdóttir Jafnréttisstofa
10:50 Kynjamynd af Austurlandi 2.0 Tinna Kristbjörg Halldórsdóttir Austurbrú
11:30 Hádegisverður    
12:25 Jafnréttismál hjá Landsvirkjun Sturla Jóhann Hreinsson Landsvirkjun
13:05 Jafnréttismál hjá Alcoa Fjarðaáli Dagmar Ýr Stefánsdóttir Alcoa Fjarðaál
13:45 Breytingar á vísum    
13:55 Samantekt    
14:00 Fundarslit    

Nánari upplýsingar um ársfund Sjálfbærniverkefnis Alcoa Fjarðaáls og Landsvirkjunar 2021.

 

 

Ársfundi frestað

Í ljósi aðstæðna vegna Covid-19 og hertra sóttvarnaaðgerða hefur stýrihópur Sjálfbærniverkefnisins ákveðið að fresta ársfundi, sem fyrirhugaður var 27. apríl, til hausts. Nánari tímasetning verður auglýst síðar.

Sjálfbærniverkefninu haldið áfram

Landsvirkjun, Alcoa Fjarðaál og Austurbrú hafa samið um að Austurbrú sjái um áframhaldandi ráðgjafaþjónustu, viðhald og þróun Sjálfbærniverkefnisins næstu fjögur árin eða út árið 2024.

Sjálfbærniverkefnið var stofnað af Alcoa Fjarðaáli og Landsvirkjun árið 2004 til að vakta áhrif framkvæmda við Kárahnjúkavirkjun og álversins í Reyðarfirði á samfélag, umhverfi og efnahag á Austurlandi.

Hlutverk Austurbrúar er, samkvæmt endurnýjuðum samningi, að vinna með stýrihópi verkefnisins að hvers konar kynningu þess, gagnaöflun, úrvinnslu gagna, undirbúningi funda, skipulagningu ásamt viðhaldi og rekstri á vef verkefnisins sem og önnur tilfallandi verkefni sem stýrihópur felur ráðgjafa að vinna.

Ný heimasíða verkefnisins

Á árinu 2020 var farið í þá miklu vinnu að uppfæra vef verkefnisins. Til að byrja með var flokkun vísa stokkuð upp og uppröðun þeirra breytt með það að markmiði að gera skipulag á síðunni markvissara og auðvelda notendum að finna upplýsingar á henni. Þann 29. maí fór nýi vefurinn í loftið á slóðinni https://www.sjalfbaerni.is. Í desember fór svo enski hluti síðunnar í loftið á slóðinni https://www.sustainability.is. Með tilkomu nýrrar síðu er endurspegluð sú þróun sem hefur orðið í upplýsingatækni og framsetningu efnis á síðustu árum.

Grunnur að rannsóknum

Í upphafi skilgreindi samráðshópur, skipaður fulltrúum samfélagsins, hvaða málefni væru mikilvægust út frá áhyggjum og væntingum fólks í tengslum við framkvæmdirnar og mótaði út frá því tillögur að vísum. Vísarnir eru 63 og mælikvarðarnir 78 og eru þeir flokkaðir í samfélagsvísa, umhverfisvísa, efnahagsvísa og fyrirtækjavísa. Mælingar á þessum vísum hafa nú staðið yfir í 14 ár.

Upplýsingasafn Sjálfbærniverkefnisins fer vaxandi ár frá ári og notagildi þess eykst jafnt og þétt. Margvísleg tækifæri til greininga og túlkunar liggja í gagnasafninu. Auk þess að varpa ljósi á þróun mála á Austurlandi gætu niðurstöður nýst á ýmsan hátt, t.d. til greininga og rannsókna á samfélagsþróun, við þróun hugmynda og verklags verkefna sem lúta að samfélagslegri ábyrgð fyrirtækja og margt fleira.

Notagildi fyrir samtímann

Alcoa Fjarðaál og Landsvirkjun hafa fullan hug á að halda Sjálfbærniverkefninu áfram á komandi árum og er það metnaðarmál allra sem að því koma að haldið sé tryggð við þau grundvallarsjónarmið sem verkefnið var byggt á í upphafi og jafnframt að það þróist og hafi notagildi fyrir samtímann hverju sinni.

Austurbrú hefur haft umsjón með verkefninu frá 2013 og er það aðgengilegt öllum á nýjum vef þess www.sjalfbaerni.is.

Búið að virkja Sustainability.is

Í lok desember var lögð lokahönd á uppfærslu á nýrri síðu og er núna búið að loka á eldri útgáfu af síðunni. Enska hluta síðunnar má nálgast með því að fara inn á https://www.sustainability.is eða smella á EN hlekkinn efst í hægra horninu á þessari síðu.

Búið að uppfæra enska hluta síðunnar

Þann 27.11.2020 var lokið við síðasta skrefið í því að færa gögn af gömlu síðu yfir á nýja síðu Sjálfbærniverkefnisins. Á næstu vikum verður unnið að því að lagfæra og fínpússa efni.

Fundargerðir stýrihóps komnar inn í skýrslugrunn

Nýjustu fundargerðir stýrihóps hafa nú verið settar inn á vefinn. Nálgast má allar fundargerðir á hlekknum https://www.sjalfbaerni.is/is/skyrslur/fundargerdir 

Vefsíðan komin í loftið

Þann 29. maí 2020 var ný og endurbætt vefsíða Sjálfbærniverkefnisins sett í loftið. Í leiðinni voru vísar endurflokkaðir til að bæta aðgengi að upplýsingum. Önnur nýjung á vefnum er að hægt er að skoða allar skýrslur verkefnisins á slóðinni: https://www.sjalfbaerni.is/is/skyrslur 

Ársfundi 2020 aflýst

Í ljósi sérstakra aðstæðna vegna COVID-19 heimsfaraldurs hefur verið ákveðið að aflýsa ársfundi 2020. Næsti ársfundur verður því haldinn vorið 2021.

Viðhorf samfélags til starfsemi Fjarðaáls og Landsvirkjunar

Búið er að uppfæra vísi Sjálfbærniverkefnisins sem snýr að viðhorfi samfélagsins til Fjarðaáls ... og Landsvirkjunar – vísir 1.19.